១.និយមន័យ
ការនិទានរឿង
គឺជាការនិយាយរឿងរ៉ាវដែលបានចេះចាំកន្លងមកប្រាប់អ្នកស្ដាប់។
ការនិទានរឿងមានទម្រង់ជាច្រើន ដូចជាការនិទានរឿងដោយផ្ទាល់មាត់ ដោប្រើសៀវភៅរូបភាព
ដោយប្រើផ្ទាំងរូបភាព ដោយប្រើតុក្កតា ឬដោយប្រើអាវអៀម។ល។
២.គោលបំណងនៃការនិទានរឿងស
កម្មភាពនៃការនិទានរឿងធ្វើឡើងដើម្បី៖
- ផ្ដល់ភាពសប្បាយរីករាយ និងបង្កើតការស្រមើស្រមៃដល់កុមារ។
- ផ្ដល់ការអប់រំដល់កុមារ។
- ធ្វើឲ្យកុមារស្រឡាញ់ចូលចិត្តសៀវភៅ។
- ធ្វើឲ្យកុមារចេះសង្កេត គិត វិភាគ ឈ្លាសវៃ និងមានសាមគ្គីភាព។
- បណ្ដុះរូបារម្មណ៍ ទម្លាប់អាន បង្កើនចំណេះដឹង និងភាពច្នៃប្រឌិតដល់កុមារ។
៣.របៀបនិទានរឿង
ជាទូទៅការនិទានរឿង គេច្រើនប្រើវិធីរ៉ាយរ៉ាប់ សន្ទនា ចោទឆ្លើយដើម្បីឲ្យខ្លឹមសារសាច់រឿងមានភាពរស់រវើកដែលអាស្រ័យទៅដោយសម្បទា និងល្បិចរបស់អ្នកនិទានម្នាក់ៗ។ ការនិទានរឿងគឺជាកិច្ចការមួយដែលយើងអាចហាត់រៀនបាន។
ការនិទានរឿងចែកចេញជាពីរជំហានដោយប្រើរយៈពេលពី ១០នាទី ទៅ២០នាទី។
ជំហានទី១៖ ទាញបម្រុងប្រយ័ត្ន (រយៈពេលពី ៣ ទៅ ៥ នាទី)
ដើម្បីឲ្យការនិទានរឿងរបស់យើងទទួលបាននូវលទ្ធផលជោគជ័យ អ្នកនិទានត្រូវអប់រំដោយប្រយោល (មិនដឹងខ្លួន)ដល់អ្នកស្ដាប់តាមរយៈល្បែង និងសំណួរផ្សេងៗដែលខ្លឹមសារមានបង្កប់នូវ៖
- ការទាញបម្រុងប្រយ័ត្ន (ភាសា គណិតវិទ្យា វិទ្យាសាស្រ្ដអនុវត្ត សិក្សាសង្គម ល្បែងសិក្សា ពាក្យបណ្ដៅ ទស្សន៍ទាយ។ល។)
- ចំណេះដឹង និងការអប់រំ
- ខ្លឹមសាររឿង
- ចេះចាំសាច់រឿង ដើម្បីនិទានមិនរអាក់អូលតាំងពីដើមដល់ចប់សាច់រឿង
- អានរឿងដែលត្រូវនិទានឲ្យបានច្រើនលើកដើម្បីយល់ខ្លឹមសាររឿងឆ្លុះបញ្ចាំងពីស្សអប់រំ
- សាកល្បងនិទានរឿងឲ្យបានច្រើនដង ដើម្បីចងចាំដំណើររឿង ឬឈុតឆាត
- ប្រើពាក្យ ឃ្លា ប្រយោគឲ្យបានត្រឹមត្រូវទៅតាមខ្លឹមសាររឿង
- ចេះប្រើសំឡេងតាមសំដីអ្នកនិពន្ធ និងតួអង្គព្រមទាំងធ្វើកាយវិការទឹកមុខតាមសាច់រឿង
- រៀបចំ និងគ្រប់គ្រងកុមារឲ្យមានសណ្ដាប់ធ្នាប់មុននឹងចាប់ផ្ដើមនិទានរឿង
- ចេះប្រើក្រសែភ្នែកគ្របគ្រងកុមារនៅពេលនិនានរឿងប្រសិនបើកុមារមិនចាប់អារម្មណ៍ត្រូវប្ដូរវិធីភ្លាម
- ផ្ដល់ឱកាសឲ្យកុមារបានចូលរួមសម្ដែងតួតាមសាច់រឿងនិងទុកឱកាសឲ្យកុមារបង្កើតរូបារម្មណ៍
- ប្រើឧបករណ៍ជាជំនួយខ្លះៗ សម្រាប់កុមារចូលរួមនៅពេលនិទានរឿង។
៣.២ ការជ្រើសរើសរឿងសម្រាប់និទាន
ការជ្រើសរើសរឿង គឺជាការងារចាំបាច់បំផុតរបស់អ្នកនិទាន
ដើម្បីឲ្យកុមារចាប់អារម្មណ៍ទៅនឹងសាច់រឿង និងចូលរួមជាមួយអ្នកនិទាន។
វិធីជ្រើសរើសរឿង៖
- ខ្លឹមសាររឿងមានរយៈពេលសមស្រប ងាយយល់ និងមានតួអង្គមិនច្រើនពេក
- ពាក្យងាយយល់ និងស្រួលស្ដាប់សមស្របតាមអាយុ និងកម្រិតយល់ដឹងរបស់កុមារ
- សៀវភៅ ឬផ្ទាំងរូបភាព ត្រួវមានរូបភាពច្បាស់។
៣.៣ ទីកន្លែងនិទាន និងការរៀបចំសិស្ស
៣.៣.១ ក្នុងបន្ទប់
- ត្រូវបើកទ្វារ ឬបង្អូចឲ្យមានពន្លឺ និងខ្យល់ចេញចូលគ្រប់គ្រាន់
- រៀបចំកុមារឲ្យអង្គុយពីតូចទៅធំតាមតុ កន្ទេលឬទៅតាមស្ថានភាពជាក់ស្ដែងដើម្បីឲ្យកុមារងាយមើលឃើញរូបភាព កាយវិការ និងទឹកមុខរបស់អ្នកនិទាន
- បើមានកន្លែងសមរម្យគួររៀបចំសិស្សឲ្យអង្គុយជាចំណិតព្រះចន្ទដែលមានចម្ងាយពីអ្នកនិទានទៅកុមារពី១.៥០ម៉ែត្រ ទៅ២.៥០ម៉ែត្រ (ដូចរូបខាងក្រោម)។
៣.៣.២ ទីធ្លាក្រោមដើមឈើ រោង ឬ អគារ (រូបថត)
- រៀបចំទីកន្លែងឲ្យបានស្អាតមុននឹងនិទានរឿង
- ត្រូវធានាសុវត្ថិភាពដល់កុមារ
- ឲ្យកុមារអង្គុយលើកន្ទេល ស្បែកជើង ឬវត្ថុផ្សេងៗដែលអាចអង្គុយបាន
- ឲ្យកុមារអង្គុយជាចំណិតព្រះចន្ទ (លំនាំក្នុងបន្ទប់)
- ឲ្យកុមារអង្គុយបែរមុខស្របនឹងពន្លឺថ្ងៃ។
