ការអានរឿង
១.និយមន័យ
ការអាន ជាសកម្មភាពមួយដែលមិនអាចខ្វះបាន ចំពោះកុមារ ក្នុងន័យទទួលបានចំណេះដឹងបន្ថែមសម្រាប់បង្កើននូវភាពឈ្លាសវៃ
និងស្ដែងចេញនូវមនោសញ្ចេតនា បង្កើនឥទ្ធិពលក្នុងការស្រមើស្រមៃ
និងសមត្ថភាពសិក្សាដើម្បីឲ្យជីវិតកាន់តែប្រសើរឡើង។
ការចាប់ផ្ដើមអានពីក្មេងអាចបណ្ដុះបំណិនជីវិតដែលនាំឲ្យគេចេះគិត យល់ដឹង ចេះវិភាគ
និងធ្វើការសម្រេចចិត្តបានត្រឹមត្រូវ។
សកម្មភាពកុមារ និងបណ្ណារក្សក្នុងពេលអានរឿង
២.គោលបំណង
សកម្មភាពនៃការអានធ្វើឡើងដើម្បី៖
- ផ្ដល់ភាពសប្បយរីករាយ និងបង្កើតការស្រមើស្រមៃដល់កុមារ។
- ផ្ដល់ការអប់រំដល់កុមារ។
- ធ្វើឲ្យកុមារស្រឡាញ់ចូលចិត្តសៀវភៅ។
- ធ្វើឲ្យកុមារចេះសង្កេត គិត វិភាគ ឈ្លាសវៃ និងមានសាមគ្គីភាព។
- បណ្ដុះរូបារម្មណ៍ ទម្លាប់អាន បង្កើនចំណេះដឹង និងភាពច្នៃប្រឌិតដល់កុមារ។
តាមការសង្កេតបានបង្ហាញឲ្យឃើញថា កុមារដែលធ្លាប់បានស្ដាប់ និងអានរឿងញឹកញាប់តាំងពីកុមារភាពនឹងក្លាយទៅជា អ្នកចូលចិត្តអាន សរសេរ រៀនពូកែ ព្រមទាំងមានឥរិយាបថវិជ្ជមានចំពោះសៀវភៅ និងការអាន។
៣.វិធីអានរឿង
មុនពេលអានសៀវភៅរឿងឲ្យកុមារស្ដាប់
បណ្ណារក្ស ឬគ្រូបង្រៀនត្រូវជ្រើសរើសសៀវភៅឲ្យបានត្រឹមត្រូវសមស្របតាមវ័យ
តាមកម្រិតយល់ដឹង និងតាមចំណង់ចំណូលចិត្តរបស់កុមារ។
ការអានរឿងមានច្រើនវិធីដូចខាងក្រោម៖
- អានសាច់រឿង និងបង្ហាញរូបភាពដំណាលគ្នាពីដើមដល់ចប់ (ដាក់សៀវភៅចំហៀងខ្លួន)
- អានសាច់រឿងមួយទំព័រ បង្ហាញរូបភាពម្ដង អានមួយទំព័រទៀត បង្ហាញរូបភាពម្ដងទៀតធ្វើបែបនេះរហូតដល់ចប់សាច់រឿង។
- អានសាច់រឿងឲ្យចប់ ទើបបង្ហាញរូបភាពយឺតៗម្ដងមួយទំព័រ។
- បង្ហាញរូបភាពយឺតៗមួយទំព័រម្ដងៗរហូតដល់ចប់ ទើបចាប់ផ្ដើមអានសាច់រឿង។
- គ្រូ ឬបណ្ណារក្សដាក់សៀវភៅអានលើតុដោយអានឲ្យសិស្សក្រុមតូចស្ដាប់។
សកម្មភាពនេះទាមទារឲ្យបណ្ណារក្សអានសៀវភៅឲ្យបានច្រើនដង ដើម្បីចាំសាច់រឿង សំដីតួអង្គ ងាយស្រួលលើកដាក់សំឡេងទៅតាមទួអង្គនីមួយៗនៅពេលអាន។
៤.ការជ្រើសរើសសៀវភៅរឿង
កុមារតូចៗចូលចិត្តរឿងណាដែលមានរូបភាពច្រើនជាងអក្សរ
និងការប្រើឃ្លាដដែលៗដូចជាសៀវភៅដែលមានតួអង្គមនុស្ស សត្វ ធម្មជាតិ
ទាក់ទងទៅនឹងជីវភាពរស់នៅប្រចាំថ្ងៃ។
ឧទាហរណ៍
រឿងបែបត្លុកកម្លែង អប់រំ មន្ដអាគម អច្ឆិរយ ផ្សងព្រេង។ល។
ក្នុងការជ្រើសរើសយករឿងមួយមកអានឲ្យលឺៗវាមានលក្ខណៈសំខាន់ដូចតទៅ៖
- លក្ខណៈផ្សេងៗរបស់តួអង្គ
- ដំណើររឿងដែលត្រូវថាឡើងវិញ
- ចុងបញ្ចប់នៃសាច់រឿងធ្វើឲ្យមានភាពសប្បាយរីករាយ
- ការសន្ទនារវាងតួអង្គ និងតួអង្គ
- ឲ្យអ្នកអានមានទម្លាប់ស្ដាប់វាក្យស័ព្ទ
- ជាឱកាសសម្រាប់អ្នកស្ដាប់ចូលរួមក្នុងការអាន
ចូរ *ចងចាំថា បណ្ណារក្ស ឬត្រូវជ្រើសរើសរឿងណាដែលអ្នកស្ដាប់ចូលចិត្តយកមកអាន។
