គេអាចចែកសូរព្យញ្ជនៈតាមលក្ខណៈបីបញ្ចែកគឺ៖
- តាមលក្ខណៈខ្យល់ៈ គេចែកសូរព្យញ្ជនៈជាបីប្រភេទគឺ៖
- ព្យញ្ជនៈខ្យល់ស្ទះ: ជាព្យញ្ជនៈដែលបន្លឺឡើងដោយមានការរៀបចំ បម្រឹង និងបំលាស់ ប្ដូរកន្លែងនៃប្រដាប់សំឡេង។ ព្យញ្ជនៈខ្យល់ស្ទះមានពីរគឺព្យញ្ជនៈខ្យល់ស្ទះមានខ្យល់ (ខឃ ឆឈ ឋឍ ថធ ផភ) និងព្យញ្ជនៈខ្យល់ស្ទះគ្មានខ្យល់ (កគ ចជ ដឌ តទ បប៊ ប៉ព អអ៊)។
- ព្យញ្ជនៈខ្យល់ច្រមុះ: ជាព្យញ្ជនៈដែលបន្លឺឡើងដោយមានភាពរំពងក្នុងច្រមុះ។ព្យញ្ជនៈខ្យល់ច្រមុះមានង៉ង ញ៉ញ ណន៉ន ម៉ម។
- ព្យញ្ជនៈខ្យល់បង្ហូរត្រដុស: ជាព្យញ្ជនៈដែលបន្លឺឡើង ដោយមានដំណើរខ្យល់ផ្លុំបង្ហូរ ត្រដុស។ ព្យញ្ជនៈខ្យល់បង្ហូរត្រដុសមានយ៉យ រ៉រ ឡល៉ល វ៉វ សស៊ ហហ៊។
- តាមលក្ខណៈឮៈ គេចែកសូរព្យញ្ជនៈជាពីរប្រភេទគឺ៖
- សូរព្យញ្ជនៈឮៈ ជាសូរព្យញ្ជនៈដែលធ្វើឲ្យចន្លោះខ្សែសំឡេងញាប់ញ័រ។ សូរព្យញ្ជនៈ ឮ មាន ដឌ បប៊ ង៉ង ញ៉ញ ណន៉ន ម៉ម យ៉យ រ៉រ ឡល៉ល វ៉វ។
- សូរព្យញ្ជនៈថ្លង់ៈ ជាសូរព្យញ្ជនៈដែលពុំធ្វើឲ្យចន្លោះខ្សែសំឡេងញាប់ញ័រឡើយ។ សូរព្យញ្ជនៈថ្លង់មានកគ ខឃ ចជ ឆឈ តទ ឋឍ ថធ ប៉ព ផភ សស៊ ហហ៊ អអ៊។
- តាមលក្ខណៈបន្លឺៈ គេចែកសូរព្យញ្ជនៈជា៨ប្រភេទគឺ៖
- ព្យញ្ជនៈបបូរមាត់ៈ កើតត្រង់បបូរមាត់ មានបប៊ ប៉ព ផភ ម៉ម។
- ព្យញ្ជនៈធ្មេញៈ កើតត្រង់ធ្មេញមុខ មានវ៉វ។
- ព្យញ្ជនៈក្រអូមមុខៈ កើតត្រង់ក្រអូមមុខ មានរ៉រ។
- ព្យញ្ជនៈគន្លាក់ក្រអូមៈ កើតត្រង់គន្លាក់ក្រអូម មានដឌ តទ ថធ ឋឍ ណន សស៊ លឡ។
- ព្យញ្ជនៈក្រអូមកណ្ដាលៈ កើតត្រង់ក្រអូមកណ្ដាល មានចជ ឆឈ ញ៉ញ យ៉យ។
- ព្យញ្ជនៈក្រអូមក្រោយៈ កើតត្រង់ក្រអូមក្រោយ មានកគ ខឃ ង៉ង។
- ព្យញ្ជនៈដើមមាត់ៈ កើតត្រង់សន្ទះដើមមាត់ មានហហ៊។
- ព្យញ្ជនៈចន្លោះខ្សែសំឡេងៈ កើតត្រង់សន្ទះខ្សែសំឡេង មានអអ៊។
