កាព្យរូបារម្មណ៍វិធីៈ ជាសិល្ប៍វិធីរបស់កវីក្នុងការទាក់ទាញអារម្មណ៍អ្នកអាន
អ្នកស្ដាប់ អ្នកទស្សនាឲ្យមានការរំភើប រីករាយ
ទុក្ខព្រួយ ជក់ចិត្ត ដិតអារម្មណ៍។
កាព្យរូបារម្មណ៍វិធីសំខាន់ៗរួមមាន៖
- វិធីបំផ្លើសៈ ជារូបារម្មណ៍ដែលស្ថិតនៅត្រង់កវីប្រើសម្ដីលើសពីការពិត ក្នុងគោលបំណងបង្ហាញសច្ចភាពណាមួយឲ្យខ្ពស់ ឬទាបបំផុត និងទាក់ទាញអារម្មណ៍អ្នកអាន អ្នកស្ដាប់ អ្នកទស្សនាឲ្យពិចារណាទៅលើបញ្ហាដែលគេចង់បង្ហាញ។
- វិធីពង្វាងៈ ជារូបារម្មណ៍ដែលស្ថិតនៅត្រង់កវីប្រើសម្ដីនិយាយពង្វាងដោយមិនប្រើពាក្យចំៗទេ តែប្រើកន្សោមពាក្យសម្គាល់បញ្ញត្តិណាមួយ ក្នុងគោលបំណង ទាក់ទាញអារម្មណ៍អ្នកអាន អ្នកស្ដាប់ អ្នកទស្សនាឲ្យពិចារណារិះគិត ឬចំអកទៅលើបញ្ហាដែលគេចង់បង្ហាញ។
- វិធីត្រឡប់ៈ ជាបដិរូបរូបារម្មណ៍ដែលស្ថិតនៅត្រង់កវីប្រើពាក្យឆ្លុះគ្នា តែមានន័យសេចក្ដីផ្សេងគ្នា ធ្វើឲ្យទាក់ទាញអារម្មណ៍អ្នកអាន អ្នកស្ដាប់ អ្នកទស្សនាឲ្យប្លែកភ្នែក ចម្លែកអារម្មណ៍។
