ពាក្យនិយាយ

កូនមាសឪពុក! មនុស្សគ្រប់រូបកើតមកក្នុងលោករមែងមានការទាក់ទងគ្នាដោយពាក្យនិយាយ ពាក្យនិយាយមានអំណាចដ៏ក្រៃលែង កូនត្រូវយល់ដូចតទៅ៖

• ពាក្យនិយាយអាច់ប្ដូរផ្លាស់ពីហេតុអាក្រក់មកជាហេតុល្អបាន។
• ពាក្យនិយាយអាចប្ដូរផ្លាស់មនុស្សមានទុក្ខអោយភ្លេចទុក្ខបាន។

• ពាក្យនិយាយអាចប្ដូរផ្លាស់មនុស្សខ្ជិលមកជាអ្នកមានសេចក្ដីព្យាយាមបាន។
• ពាក្យនិយាយអាចប្ដូរផ្លាស់មនុស្សល្ងង់អោយមកជាមនុស្សឆ្លាតបាន។
• ពាក្យនិយាយអាចប្ដូរផ្លាស់មនុស្សដែលកំពុងមានកង្វល់មកជាមនុស្សស្ងប់បាន។
• ពាក្យនិយាយអាចប្ដូរផ្លាស់មនុស្សចចេសរឹងរូសអោយមកជាមនុស្សប្រដៅងាយបាន។
• ពាក្យនិយាយអាចប្ដូរផ្លាស់មនុស្សដែលខូចសតិអោយមានសតិវិញបាន។
• ពាក្យនិយាយអាចប្ដូរផ្លាស់ពីមនុស្សឈ្លោះគ្នាទៅជាល្អនឹងគ្នាវិញបាន។

         យ៉ាងណាចំពោះពាក្យនិយាយនេះរមែងមានអំណាចដូចគ្នាដែរគឺអាចនិយាយអោយមនុស្សខូចប្រយោជន៍ និយាយទម្លាយនូវសេចក្ដីសុខចម្រើនរបស់អ្នកដទៃបានគ្រប់យ៉ាង។ ដូច្នេះកូនត្រូវបដិបត្តិក្នុងការនិយាយអោយបានហ្មត់ចត់ ពោលគឺកូនត្រូវហាត់និយាយនៅក្នុងវាចារប្រាំយ៉ាងគឺ៖

• និយាយពាក្យពិត មិននិយាយឡេះឡោះ។
• និយាយពាក្យពិរោះ មិននិយាយញោះញង់។
• និយាយត្រឹមត្រូវតាមកាលៈទេសៈ។
• និយាយអោយបានប្រយោជន៍ដល់អ្នកស្ដាប់។
• និយាយដោយចិត្តមេត្តា ប្រាថ្នាអោយអ្នកដទៃបាននូវសេចក្ដីសុខ ឬនិយាយដោយចិត្តសប្បុរស ស្មោះត្រង់ មិននិយាយរបៀបព្រួសពិសដាក់អ្នកដទៃ។